Amjad Islam Amjad

Teri zad se nikalna chaahta hai

Teri zad se nikalna chaahta hai
ye dariyaa rukh badalna chaahta hai

vo sapna jis ki suurat hi nahin hai
meri aankhon me chalnaa chaahtaa hai

dilon ki maandagi pe kya ta'ajjub
ki suuraj bhi to Dhalnaa chaahtaa hai

nashist-e-dard badali hai to ab dil
zaraa pehaluu badalnaa chaahtaa hai

mujhe bhi saamnaa hai karbalaa ka
mera sar bhi uchhalna chaahta hai

nahin hai tarjumaan-e-Gam ye aansuu
ye paani ab ubalnaa chaahtaa hai

tabassum zer-e-lab kehata hai 'Amjad'
koi jazbaa machalna chaahta hai