Majaz

 Junuun-e-shauq ab bhi kam nahin hai

junuun-e-shauq ab bhi kam nahin hai

 magar vo aaj bhi barham nahin hai


 bahut mushkil hai duniyaa ka sanvaranaa...

 teri zulfon ke pech-o-Kham nahin hai


 bahut kuchh aur bhi hai jahaan men

 ye duniyaa mahaz Gam hi Gam nahin hai


 meri barbaadiyon ke ham_nashinon

 tumhen kya Khud mujhe bhi Gam nahin hai


 abhi bazm-e-tarab se kyaa uthuun main

 abhi to aankh bhi pur_nam nahin hai


 ‘Majaz’ ek baadaakash to hai yaqinan

 jo ham sunate the vo aalam nahin hai