paa-ba-gil sab hain rihaai ki kare tadabir kaun
dast-bastaa shahar me khole meri zanjir kaun
meraa sar haazir hai lekin meraa munsif dekh le
kar rahaa hai mere fard-e-jurm ki tahriir kaun
aaj darvaazon pe dastak jaani pahachaanii si hai
aaj mere naam laataa hai meri taaziir kaun
niind jab Khvaabon se pyaari ho to aise ahad me
Khvaab dekhe kaun aur Khvaabon ko de taabir kaun
ret abhi pichhale makaanon kii na vaapas aai thi
phir lab-e-saahil gharaundaa kar gaya taamiir kaun
saare rishte hijraton me saath dete hain to phir
shahar se jaate hue hota hai daaman ger kaun
meri chaadar to chheni thi shaam ki tanhai ne
beridaaii ko meri phir de gaya tashhiir kaun
dushmanon ke sath mere dost bhi aazaad hain
dekhana hai khenchataa hai mujh pe pehlaa teer kaun
Posts
No comments:
Post a Comment